LOS ANGELES, Marekani

Mazishi ya Whitney yatafanyika Jumamosi kwa mwaliko

WHITNEY Houston anatarajia kuzikwa Jumamosi wiki hii kwenye makaburi jirani na kanisa ambalo aliimba kwaya alipokuwa mdogo, mjini New Jersey, lakini watu wachache tu ndiyo watakaoshiriki mazishi yake tena kwa mwaliko maalum toka familia yake. Kwa mujibu wa taarifa toka sehemu atakayozikwa, 'Whigham Funeral Home', mazishi yake yatafanyika majira ya saa sita mchana, ambapo kabla itafanyika ibada kwenye kanisa la New Hope Baptist. Whitney, 48, alikutwa amekufa Jumamosi iliyopita kwenye bafu la hoteli ya Beverly Hills.Mwili wake ulisafirishwa kwenda mjini New Jersey na kupokelewa kwenye uwanja wa Ndege wa Teterboro Jumatatu wiki hii na kisha kupakiwa kwenye gari maalum ililopendezeshwa na madini ya dhahabu. Msimamizi wa makaburi hayo, Carolyn Whigham, alisema siyo watu wote watakaoruhusiwa kushiriki mazishi hayo ila kwa wale tu watakaopewa mwaliko maalum. "Amekuwa kwenye mji huu karibu miaka 30 akiimba, kwenye jimbo na duniani," alisema wakati akiongea na waandishi wa habari na kuongeza: "Sasa ni wakati wa wao pia kumuaga." Uchunguzi wa sababu za kifo chake ulifanyika Jumatatu, lakini itachukua zaidi ya wiki nane kabla ya kufahamu chanzo. Mpaka sasa hakuna kesi yoyote iliyofikishwa mbele ya vyombo vya sheria kuhusu kifo chake, Polisi wa Los Angeles walisema na kuongeza: "Chumbani kwake hakukuwa na maelezo ya matumizi ya dawa." "Houston alikutwa amekufa kwenye sinki la kuogea katika bafu la hoteli aliyofikia," taarifa zilisema. Rambirambi za maua na mishumaa zimewakwa nje ya kanisa alilokuwa akiimba alipokuwa mdogo katika mji mdogo wa Newark. "Baada ya kukutwa katika hali isiyoelewa, Whitney alipewa huduma ya kwanza, lakini muda mfupi baadaye ilijulikana kwamba alishafariki zamani," taarifa zilisema zaidi. Hata hivyo Polisi hawataki kuamini kama dawa zilizokutwa chumbani kwake zinaweza kuwa chanzo cha kifo chake . "Idara yetu ya uchunguzi wa Polisi Beverly Hills, haijajiridhisha kuamini uvumi unaoendelea kusemwa wakati huu kuhusu kifo chake," alisema Luteni Rosen. "Hatuna uthibitisho na uvumi huo." Lakini alikiri kwamba kulikuwa na chupa za dawa kwenye chumba cha Whitney "Zilikutwa chupa nyingi za dawa," alisema Ed Winter, msaidizi kanali. "Alikuwa shabiki wa kila mmoja," alisema Gregory Hanks, 26, mcheza filamu katika mji alikozaliwa Houston. Taarifa toka Ikulu ya Marekani, zinasema Rais Barack Obama ametuma salamu za rambirambi kufuatia msiba huo. Habari hii ni kwa hisani ya Mwananchi Communications

DAR ES SALAAM

WAWILI WAKAMATWA JARIBIO LA WIZI WA GARI MWANANYAMALA

HABARI /PICHA: HARUNI SANCHAWA, GPL  

 

 Askari wakiwachukua watuhumiwa, mmoja amesimama na mwingine amekaa (kulia).

 Watu wakilitazama gari lililotaka kuibiwa.

 JESHI la  polisi Mkoa wa Kipolisi Kinondoni limewakamata vijana wawili waliokuwa wakitaka kuiba gari ndani ya hospitali ya Mwananyamala jijini Dar es Salaam leo.
 Sakata hilo limetokea maeneo ya hospitali hiyo  na  kuvuta idadi ya watu wengi eneo hilo ambapo vijana hao waliohusika majina yao hayakupatikana na  walitiwa mbaroni na polisi.

HABARI /PICHA: HARUNI SANCHAWA, GPL

KIJIJI CHA WAZIRI CHAPEKULIWA UCHAWI

Na Rhobi Chacha
HABARI zilizotua juu ya dawati la Risasi Jumatano wiki hii zinadai kuwa msako mkali unaendelea mkoani Mtwara, waganga wa kienyeji wanaingia nyumba hadi nyumba kunasa wachawi, aya zinazofuata zinaachia kila kitu.

Kwa mujibu wa chanzo chetu, waganga hao walifika hadi kwenye kijiji alichozaliwa Waziri wa Nchi Ofisi ya Rais, Menejimenti ya Utumishi wa Umma, Mheshimiwa Hawa Abdurahman Ghasia.

NI NYUMBA KWA NYUMBA
Inadaiwa waganga hao wamo mkoani humo kwa operesheni maalum kufuatia agizo ambalo mpaka sasa haijajulikana nani alilitoa.

Habari zaidi zinasema kuwa zoezi hilo kwa sasa limeshamiri na kuingia kata kwa kata na nyumba hadi nyumba.

Chanzo kikaendelea kudai kuwa baada ya amri ya  kuwepo kwa zoezi hilo, nyumba kadhaa zimekumbwa na kashikashi hiyo ya kushangaza.

Kijiji alichozaliwa Waziri Ghasia ni Naumbu, Kata ya Mikindani, Mtwara Vijijini ambapo habari zinadai karibu wakazi wake wote ni ndugu na wanaishi kwa umoja.

Chanzo: “Lakini ndani ya baadhi ya nyumba walikuta vitu vya ajabu, nyingine hawakukuta vitu.” Kikaendelea kudai: “Katika safari hiyo, wakafika kwenye nyumba ya bibi mmoja (jina halikupatikana mara moja), humo inadaiwa walinasa vitu lakini haikujulikana kama ni vya uchawi au la!”

WAANDISHI WAMBANA MBUNGE
Naye Ripota Wetu wa Mtwara, Sijawa Omary anasema kuwa baada ya waganga kupekua nyumba mbalimbali za eneo hilo, waandishi wa habari mkoani humo walimwita Waziri Ghasia ambaye pia ni Mbunge wa Mtwara Vijijini na kuzungumza naye wakimtaka aeleze alichonacho kuhusu zoezi la ‘wasakaji’ hao.
Waziri huyo, pamoja na mambo mengine hakuonesha uhalali wa kuwepo kwa operesheni hiyo na hivyo kutotolea ufafanuzi wa kutosha.

VIGOGO WAUMBUKA
Naye mwenyekiti wa kijiji kimoja mkoani humo ambaye aliomba majina yake na ya kijiji yasitiriwe, alisema zoezi hilo limeumbua watu mkoani Mtwara, lakini pia amejifunza kuwa, wapo binadamu ambao kwa macho ni wazuri, lakini usiku wana mambo yao ya hatari.

“Zoezi linaendelea lakini ukweli ni kwamba kuna vigogo wameumbuka. Kumbe unaweza kumwona mtu mchana ukaamini ni mwema, usiku ni adui, hii ni hatari,” alisema mwenyekiti huyo.

WAFANYABIASHARA WAFURAHIA
Aidha, habari zaidi zinasema kuwa, uchawi unaovuma zaidi mkoani humo kwa sasa unaitwa Mang’opo ambapo wafanyabiashara wanaibiwa fedha zao bila kujijua.

“Huku Mtwara unaweza ukafanya biashara yako kuanzia Januari mpaka Desemba usione fedha iliyoingia, wewe kila siku ni kutoa kwa ajili ya kuendesha biashara lakini faida haionekani.
“Ukiona hivyo ujue wapo wataalamu tayari wanakula fedha yako. Wapo wale ambao wanajifanya ombaomba, ole wako umpe fedha na aone kwenye pochi yako kuna kiasi gani, utakuja kushangaa hakuna fedha.

“Ama kuna ile ya kutoa fedha dukani ambayo itahitaji chenji, ole wako ile chenji uichanganye na fedha zako nyingine katika pochi, utalia,” alisema mwanakijiji mmoja huku akikataa kutaja jina lake.

Hata hivyo, habari za uhakika zinadai kuwa, baadhi ya wachawi wametoa Mang’opo yao ndani ya nyumba na kwenda kuchimbia chini ya ardhi wakisubiri zoezi hilo lipite.

Risasi Jumatano juzi Jumatatu lilimtafuta Waziri Ghasia ili azungumzie sakata hilo na alipopatikana alisema: “Ni kweli waganga hao walifika katika kijiji chetu na kufanya upekuzi kuhusiana na masuala ya ushirikina.
“Walifanya hivyo katika nyumba mbalimbali lakini kwenye nyumba yangu na ya wazazi wangu hawakupekua.”

KAMANDA WA MKOA AZUNGUMZA
Kamanda wa Polisi wa Mkoa wa Mtwara, Maria Nkuzi alipoulizwa na Risasi Jumatano kuhusu sakata hilo alikiri kutokea.

“Ni kweli kumekuwa na hali hiyo, watu wanaojiita waganga wamekuwa wakiingia nyumba hadi nyumba na kudai wanatoa vitu vya uganga, lakini serikali imeanza kuwakamata na baadhi yao wamefikishwa mahakamani,” alisema Afande Nkuzi.
Habari hii ni kwa hisani ya Global Publishers

HONDURAS

Moto wateketeza gereza na kuua watu 272 Honduras

Moto mkubwa umetokea katika gereza moja nchini Honduras na kuua takriban wafungwa 272,wengi wao wameteketea wakiwa kwenye seli zao.

Hayo ni kwa mujibu wa taarifa ya Lucy Marder, mkuu wa idara ya uchunguzi wa sababu za kifo katika ofisi ya waendesha mashtaka. Mkuu wa magereza Danilo Orellana amesema moto huo, ambao chanzo chake bado hakijajulikana, ulitokea jana usiku katika mji wa Comayagua, kilomita 140 Kaskazini mwa mji mkuu wa Honduras.

Akielezea janga hilo mara tu baada ya kufika gerezani hapo, msemaji wa kikosi cha zima moto, Josue Garcia amesema aliona picha za ajabu zinazotisha kama za kishetani wakati akijaribu kuzima moto huo.

Gereza hilo lina kiasi ya wafungwa , 800 na wakati baadhi wakifanikiwa kutoroka zaidi ya wafungwa 100 walikufa  papo hapo baada ya kushindwa kujiokoa kwani mlinzi aliyekuwa na ufunguo haikujulikana aliko.

WATOTO WANAKUFA

Watoto 300 wanakufa kila saa kwa utapiamlo

Save the Children linamsihi Waziri Mkuu wa Uingireza kuitisha mkutano huko London baadae mwaka huu kuzungumzia suala la njaa duniani

 

• 
• 

Picha VOA 

 

Utafiti mpya unasema utapiamlo ni kiini kinachosababisha vifo kwa watoto wapatao milioni 2.6 kila mwaka.

Ripoti kutoka kundi moja la kimatiafa la kutoa misaada  la Save the Children, inasema licha ya juhudi za ulimwengu kumaliza njaa utapiamlo unabaki kuwa tatizo kubwa lililopuuzwa ambalo linaathiri robo ya watoto ulimwenguni.

Utafiti uliofanywa mwezi Disemba na Januari unasema kwamba watoto 300 wanakufa kila saa kwa sababu ya utapiamlo.

Kundi linasema kuongezeka kwa bei ya chakula kumelazimisha watoto katika nchi nyingi kuacha shule ili kusaidia familia zao kupata fedha.

Katika kesi nyingi, ripoti ilisema utapiamlo haukuwa matokeo pekee ya kutokuwa na chakula cha kutosha, lakini kwa sababu familia haziwezi kumudu kupata chakula bora.

Save the Children linamsihi Waziri Mkuu wa Uingereza, David Cameron kufanya mkutano juu ya njaa duniani pembeni ya michezo ya Olympic mwaka 2012 itakayofanyika huko London baadae mwaka huu.

Shirika lilisema asilimia 90 ya watoto wengi wasiojiweza duniani wangeweza kulindwa kutopata utapiamlo kwa kiwango  kidogo cha dola bilioni 10 kwa mwaka.   

AFRIKA KUSINI

Kesi ya ulanguzi yamuandama Rais Zuma

Chama cha Democratic alliance kinasema kuwa uamuzi wa mwendesha mashataka wakati huo wa kuondoa mashataka dhidi ya Rais Jacob Zuma ulichukuliwa kwa misingi ya kisiasa na sio kisheria.

Anakabiliwa na tuhuma za kuhusika na ulanguzi

Katika kipindi hicho chama cha ANC kilishuhudia mvutano mkali wa kisiasa na kulikuwa na madai kuwa idara za serikali zilikuwa zinatumiwa kuwa nyamazisha mahasimu wa kisiasa waliokuwa wanang'ang'ania madaraka.

Katika kipindi hicho mkuu wa kitengo maalum cha upelelezi cha polisi maarufu kama scorpions na mwendesha mashtaka walidaiwa kufanya njama ya kummaliza kisiasa Rais Zuma.
Kanda za mazunguzmo hayo kati yao zilitumika mahakamani kama ushahidi wa njama hiyo.

Mwaka wa 2007, Jacob Zuma alifunguliwa mashataka ya kuhusika na rushwa, udanganyifu na ulanguzi.
Kesi hiyo dhidi yake iliwasilishwa siku nane baada ya kumshinda aliyekuwa Rais wa Afrika Kusini, Thabo Mbeki kwenye mvutano wa kukiongoza chama cha ANC.

Mashtaka hayo yaliibuka baada ya aliyekuwa mshauri wa masuala ya kiuchumi wa Zuma, Shabir Shaik alipopatikana na hatia ya ulanguzi.

Mshataka dhidi ya Zuma yaliondolewa, wiki mbili kabla uchaguzi wa April mwaka 2009. Hatua hiyo iliwaudhi viongozi wa upinzani na baadhi ya mashirika ya kijamii huko Afrika kusini.

Wakosoaji wanasema lazima mahakama iamue ikiwa kweli kiongozi huyo alikuwa na hatia. Kwa hivyo uamuzi wa mahakama kuu kuhusu kesi hii unasubiriwa kwa hamu.

UGANDA

Waziri avamia wapenzi wa jinsia moja

 15 Februari, 2012 - Saa 10:50GMT

Mbunge Bahati aliwasilisha muswada mapema mwaka huu

Waziri mmoja nchini Uganda amevamia warsha ya wanaharakati wa mapenzi ya jinsia moja na kujaribu kumkamata mwandaaji wa shughuli hiyo, limesema gazeti moja la huko na pia kundi la wanaharakati wa haki za binaadam waishio Uingereza.

Waziri wa Maadili na Hadhi Simon Lokodo amesema mkutano huo ni "haramu" na kuamrisha wajumbe wake kutoka nje ya hoteli karibu na mji mkuu Kampala.

Hatua hiyo inakuja siku chache baada ya mbunge mmoja kuurejesha muswada wenye utata wa kupinga mapenzi ya jinsia moja.

Muswada huo unapendekeza kuongeza adhabu nchini Uganda kwa vitendo vya mapenzi ya jinsia moja, ambavyo ni kinyume cha sheria, kutoka kwenda jela miaka 14 hadi kifungo cha maisha.

Kujadiliwa

David Bahati, mbunge aliyewasilisha hoja hiyo binafsi, alisema kipengele kinachopendekeza adhabu ya kifo kitaondolewa.

Muswada huo ulipendekezwa kwa mara ya kwanza mwaka 2009, lakini haukuwahi kujadiliwa.

Warsha hiyo ilikuwa imeandaliwa na shirika liitwalo Freedom and Roam Uganda, shirika ambalo lilianzishwa na mwanaharakati mashuhuri wa wapenzi wa jinsia moja Kasha Jacqueline Nabagesera.

Ilikuwa ikifanyika katika hoteli moja mjini Entebbe, kilomita 40 kutoka mji mkuu Kampala, gazeti la Daily Monitor limeripoti.

Nguvu

"Nimeufunga mkutano huu kwa sababu ni haramu. Hakuruhusu mapenzi ya jinsia moja nchini Uganda. Kwa hiyo rudini nyumbani," gazeti hilo limemkariri Bw Lokodo.

Kwa mujibu wa kundi la haki za binaadam la Uingereza, Amnesty International, Bw Lokodo alisema kama wanaharakati hao hawataondoka mara moja, angetumia nguvu dhidi yao.

Waziri huyo pia aliamrisha kukamatwa kwa Bi Nabagesera, ambaye alitunukiwa tuzo ya Martin Ennals mwaka jana kwa harakati zake za kupigania haki za wapenzi wa jinsia moja nchini Uganda.

Haki

Hata hivyo mwanaharakati huyo alitoroka na kukimbia hotelini hapo.

"Hili ni jaribio la kushangaza la kuzuia shughuli za amani na za kihalali za watetezi wa haki za binaadam nchini Uganda," amesema katibu mkuu wa Amnsety International, Salil Shetty, kupitia taarifa aliyotoa.

Marekani na Uingereza zimetaka nchi zinazoendelea kuheshimu haki za wapenzi wa jinsia moja la sivyo watakuwa katika hatari ya kupiteza misaada wanayopatiwa.

Tangu muswada huo uliporejeshwa bungeni, kumekuwa na taarifa za kuongezeka kunyanyaswa kwa wapenzi wa jinsia moja, limesema kundi la haki za wapenzi hao.

Kisa na mkasa na Salim Kikeke

Kula ukiwa umevaa nguo

Moja ya jiji linalotajwa kuwa huru na lenye uvumulivu nchini Marekani, San Fransisco, sasa limeamua kuweka bayana kuhusu suala la watu kula chakula hadharani wakiwa hawajavaa nguo.

Bodi ya wasimamizi ya jiji hilo imeweka sheria mpya kukataza watu wasiovaa nguo kula katika migahawa, bila kufunika na vitambaa viti wanayokalia, limeripoti gazeti la San Fransisco Examiner.
Yeyote atakayekiuka sheria hiyo mpya atapigwa faini ya dola mia moja kwa mara ya kwanza, na dola mia mbili iwapo watarudia tena, na mara ya tatu atapigwa faini ya dola elfu moja au kwenda jela kwa mwaka mmoja. Watu kutembea bila nguo mitaani ni jambo linalovumilika mjini humo hasa katika eneo la Castro.

FLAT SCREEN GEREZANI

Polisi mjini Acapulco kusini magharibi mwa Mexico wamekuta wafungwa katika gereza moja wakiwa na televisheni mia moja, deki za DVD, magunia mawili ya bangi na majogoo mia moja.
Polisi wamesema televisheni hizo zilikuwa flat screen. Aidha wamesema wamekuta pia wanawake 25 wakiishi katika sehemu ya wafungwa wanaume, sita kati yao walikuwa wafungwa, lakini 19 waliosalia ni wahamiaji haramu, ambao vyombo vya habari vimeripoti kuwa ni makahaba.
"Hatimaye tumekamata wanawake 25 wakiwa wamevaa mawigi" Amesema Arturo Martinez, msemaji wa jimbo la Guerro. Majogoo mia moja waliokutwa ndani ya gereza hilo imeelezwa ni kwa ajili ya mchezo wa kuwapiganisha ambao ni maarufu katika eneo la Amerika ya Kusini.
Mkuu wa gereza hilo, mkuu wa usalama wa gereza na baadhi ya walinzi wa gereza hilo wamefukuzwa kazi.

111111

Kimamama waja wazito wanaokaribia kujifungua nchini Korea Kusini, walipeleka maombi ya kutaka kujifungua kwa kufanyiwa upasuaji siku ya Ijumaa, ili watoto wao wazaliwe, tarehe kumi na moja ya mwezi wa kumi na moja mwaka elfu mbili na kumi na moja.
Namba za utambulisho wa utaifa wa Korea Kusini zina tarakimu kumi na tatu, na tarakimu sita za mwanzo huwa tarehe ya kuzaliwa, na hivyo vitambulisho vya watoto hao vitakuwa na vikianza na namba 111111 na kufuatiwa na namba nyinginezo. Idadi ya kinamama waliotaka kujifungua mwaka huu ni asilimia 20 zaidi ya miaka mingine.
Kinamama ambao tarehe zao za kujifungua ni wiki moja baada ya tarehe kumi na moja wamesema wako tayari kujifungua mapema, limeripoti gazeti la Seoul. Wakati huohuo, mapacha wawili nchini Marekani walipanga kufanya sherehe kubwa ya kuadhimia miaka kumi na moja ya kuzaliwa, siku ya tarehe kumi na moja mwezi wa kumi na moja mwaka 2011.
Novemba kumi na moja ni maarufu nchini Korea Kusini ikijulikana kama siku ya Pepero, au siku tamu, sawasawa na siku ya wapendanao ya Valentine.

NYUKI

Zaidi ya nyuki elfu sitini wamekutwa katikia myumba ya bwana mmoja aliyekutwa amekufa nchini Marekani.
Mtandao wa news.com umesea bwana huyo amekufa kutokana na sababu zosizojulikana, lakini nyuki walikutwa wakiinshi ndani ya ukuta wa nyumba yake.
Mtu huyo ambaye hakuwa ametambuliwa alikutwa na mwanaye wa kike, kimeripoti kituo cha TV cha WPLG. Mtaalam wa nyuki Willie Sklaroff ambaye ataondoa nyuki hao amesema wako karibu elfu sitini.
Taarifa zinasema bwana huyo alikuwa akikarabati nyumba hiyo kwa ajili ya kumpa mwanaye wa kike, lakini pia haifahamiki kama alikuwa akiwafuga nyuki hao, au hata kama alikuwa akifahamu kama wanaishi nyumba moja.

KADI NYEKUNDU KWA KUVAA NYEKUNDU

Mwamuzi mmoja wa soka hapa Uingereza alitoa kadi nyekundu kwa wachezaji sita kwa sababu ya rangi ya nguo zao za ndani.
Tukio hilo liliokea Wales ambapo mwamuzi aligundua mchezaji wa timu moja alikuwa amevaa nguo nyeupe ya ndani huku bukta yake ikiwa rangi nyekundu, limeripoti gazeti la Bath Cronicle.
Mchezaji mwingine alionekana na mwamuzi huyo akiwa kavaa nguo ya ndani ya rangi nyeusi. Mchezo huo ulikuwa kati ya timu moja ya England ikipambana na Bath City ya Wales.
Sheria za chama cha soka cha England zinasema wachezaji wanatakiwa wavae rangi zinazifanana za nguo za ndani na nje. Hata hivyo sheria hiyo huwa haizingatiwi sana.
Kuongeza utata, refa huyo aliwataka wachezaji wawili kubadili nguo zao mbele ya mashabiki, na wakati wawili hao wako nje, timu yao ikafungwa bao moja.
Timu hiyo iliishia kuchapwa mabao 6 kwa bila.

Na kwa taarifa yako...

Chuma huwa kizito zaidi kikipata kutu.